View Full Version : الكحة بتدبحني..عذاااب..أريد حلاً فوري!!
حرية تائهة
14-01-2007, 23:18
صار ليي أربعة أيام الكحة مو راضية تفارقني
أول يومين كانت أهون، أما أمس واليوم صار ليي 48 ساعة مو قادرة حتى أنام منها
على طول مرافقتني وأكح بشكل متواصل وكل ما جليها بدل ما تخف تزيد ! صدقوني الكحة عذااااااااااب
بموت من التعب ومو قادرة أنام أحاول أنام أفطس من الكحة
هذي مو المشكلة لو ان شاء الله ما تفارقني الكحة
بس المشكلة عندي بكرا امتحان وأني للحين مو قادرة لا أدرس ولا أنام!!
ثالث يوم من صادتني الكحة أخذت دوا شراب من الصيدلية اسمه Mentex (شراب مسكن للسعال ومزيل للاحتقان) المشكلة زيّد الكحة - على طول اكح - ونشّف حلقي وصارت الكحة عندي كلش جافة وزاد على الكحة ألم حلقي...
واليوم (اللي هو اليوم الرابع) رحت المستشفى وما عطلت طلعت للدكتورة الدوا اللي أخذته من الصيدلية وقلت ليها چان تعطيني دوا افضل منه، وعطني دوا شراب Ezipect ووياه حبوب ZYRTIC وحبوب أدول!!
المهم استخدم الدوا اليوم وكلش ما حصلت أي نتيجة
واليوم المغرب استخدمت عسل صافي وبعد ما تحسن ولا 1%
وأخيراً استخدمت (الفكس) اللي في حياتي ما أطيق استخدمه خير شر بس من شدة عذاب الكحة استخدمته غصب عني وبعد ما في نتيجة!!!
الكحة بتدبحني
أريد حل فوري يوقفها عند حدها
اللي يعرف يعطيني الحل الحين الحين الحين
لأني صدق شكلي بموت منها :wei: :wei: :wei:
بكرا أكيد أكيد برسب في الامتحان ما درست ولا ربع لكتاب :wei:
اشربي الحلوه ..يقولون زينه
يبيعونه في الحواويج اللي يبعيون الاعشاب ..
الله يشافيش ويشافي امي العزيزة ويشافي جميع المؤمنين والمؤمنات يارب
نوارة 11
15-01-2007, 21:09
ال Zyrtic هذا مضاد للحساسية .. تمام هلدوا .. يجيب النوم اكيد قالو لش تاخذينه بالليل .. فعال في اغلب الحالات بس لا تستخدمينه واجد اسبوع كحد اقصى :wer:
الدوا الثاني .. هذا للكحة .. انتين قلتين ليهم كحتش جافه ؟؟! لانه هذا اعتقد انه للكحة اللي وياها mucus ويش يعني مواد مخاطية :wed: عادة الكحة الجافه يعطونهم بينيلين Benylin
العسل تمام بعد .. استمري عليه .. مو مرة مرتين وتبين تصيرين زينة:1: مو سحر هو :1:
الاحسن انش تخلين العسل ويه حليب ساخن .. واذا ماتحبين الحليب اكلي العسل بروحه وشربي اشياءات ساخنه على طووووول ..
الله يشافيك
الدواء مفيد مع دوام الاستعمال ..
الحليب الساخن .. والعسل الطبيعي مفيد ..
لكن اللي أعرفه إن الكحة تاخذ وقت .. حتى تروح ..
الله يعطيك الصبر و يشافيك يا أختي ..
..
انوار المنتظر
15-01-2007, 23:03
السلام عليكم ورحمة الله وبركاته
اللهم صلّ على محمد وآل محمد
اخيتي ذكرتيني بالذي مضى...........
عاد هذا اني في فترة الحمل كنت اعاني من كحه شديه لدرجه اني كنت انام و اني في و ضعية الجلوس لمدة شهرين لان كانت عندي كحه و الم في الظهر و كلما كحيت احس ان ظهري يتكسر....
المهم و كلمن يقول لي دواء:
حليب و كركم
عسل من الصبح
ابلعي حلوه مطحونه
نباته
شاي ينسون
هذا غير ادوية المستشفى البرتقالي والوردي و الشفاف....حتى اني كنت اسميهم علـ اسامي البيبسي.
ما اطول عليش السالفة داك اليوم نزلوني من الجناح الي قسم اشعة الكلى و ظليت انتظر فترة و اني عافسه المكان من الكحيح يعنوا كحة و كانت بجنبي سيدة اعتقد ان جنسيتها عراقيه كانت تسألني عن حالتي و ش فيي و اعطتني دواء قالت لي ان هذا الدواء من ايران و ما في منه في البحرين وو صفة لي طريقة استخدامه و فعلاً جزاها الله خير الجزاء من اخذت هذا الدواء و كأن شياً لم يكن .
هذا الدواء هو علي شكل حجر اسود تحصلينه فقط عند الجواهري تاخذين قطعة صغيرة بمقدار حبة النخج و تذوبينها في كوب ماء ساخن و تشربينه بشكل يومي .
صدقيني انا لا زلت اذكر تلك السيده و ادعوا لها من كل قلبي بالفرج و قضاء حاجتها.
حريتووووو ،، إذا خرج جيش يدافع عن أرضه ،، تحبين تمنعينه أو توقفينه ؟؟
الكحة هي طريقة من طرق الجسم للدفاع عن نفسه ضد عنصر دخيل ، فليش تبغين تمنعينها ؟؟
اللهم صلّ على محمد وآل محمد ،،
ساعدكِ الله خيوو ،، ماتشوفين شر ،،
على عمري أختي حريتوو :( ،،
أني بعطيش حل ،،
أكلي مثلج وشربي سوائل باردة :wer: ،،
الكحرة كريهه ،، صار لي فترة رافقتني اكثر من شهر بس فترة بشكل خفيف وفترة تزيد ،،
أنوار موسوية
16-01-2007, 11:38
يا لهوي يامصيبتي :doh:
حرية تائهة ماغيرها !! :wei:
..
ماعليش شر وان شاء الله تخف عليش الكحة بسرعة ولو ان هذا مستحيل هي أول تكسر ضلوع الصدر والعافية بعدين تفكر تخف !! :wei:
..
ما عندي حل لأن اللعام جتني نفس الحالة وماخفيت إلا بعد مرور شهرين !! نصحتني القصيدة الضائعة الله يشافيها ويعافيها بدوا السعلة أبو الورقة الخضرة لكن الكحة أول تاخد حيفها بعدين تخف !! :11wn:
..
لا تشربين دواء السعلة وتطلعين تسوقين !! :weh:
..
ماعليش شر
..
الله يشافيش ويعافيش
..
استانست يوم شفت رد شموع ونوارة11 قلت لا ماينخاف علينا من انفكر في دواء بنجي ليهم فنتيناتهم :uio:
..
نسألكم الدعاء
أم-المنتظر
16-01-2007, 16:23
اللهم صلّ على محمد وآل محمد
عاد اني ماعندي الا صيدلية امي العودة الله يرحمهااااا ...:wei:
اخذي نباته (الحلوه) .. سخنيها في مقلاية الى ان تسيح ... ثم اسكبي عليها ماي بمقدار فنجان او نص فنجان ... ايصير لونها اصفر او بني فاتح ... مو تحرقينهااااا :wer:
اشربيها على الفال من الصبح .. قبل ان تشربي او تاكلي اي شيء .. :wem:
وايضاً قبل النوم ....:uio:
والله الشافي والمعافي .. وماتشوفين شر !!
الحكة تخلل المخ عدل .. واحس انها تجيب ارتجاج في المخيخ الداخلي ...:whi1:
الله يساعدش :hitler:
شوووكررررا
أختكم
درووب
:wep:
حرية تائهة
16-01-2007, 17:18
بواسطة البراءة
اشربي الحلوه ..يقولون زينه
يبيعونه في الحواويج اللي يبعيون الاعشاب ..
الله يشافيش ويشافي امي العزيزة ويشافي جميع المؤمنين والمؤمنات يارب
من قرأت ردش رحت ادور في المطبخ ما حصلته
اليوم صارت الكحة أحسن إذا ما تسحنت بحط في حسابي هذا الدوا
بس أني كلش ما أحبها هالحلوة (O)
الله يشافي الوالدة ويعافيها :wem:
بواسطة نوارة 11
ال Zyrtic هذا مضاد للحساسية .. تمام هلدوا .. يجيب النوم اكيد قالو لش تاخذينه بالليل .. فعال في اغلب الحالات بس لا تستخدمينه واجد اسبوع كحد اقصى
أي قالت ليي آخذه قبل النوم، المشكلة أني ما في شي ينيمني، جربت أخذته في الليل وما نيمني ضليت سهّارية للصبح، الدكتورة قالت استخدمه 3 أيام بس
الدوا الثاني .. هذا للكحة .. انتين قلتين ليهم كحتش جافه ؟؟! لانه هذا اعتقد انه للكحة اللي وياها mucus ويش يعني مواد مخاطية عادة الكحة الجافه يعطونهم بينيلين Benylin
أني راويتها الدوا اللي من الصيدلية (منتكس) قلت ليها انه نشّف حلقي وصارت الكحة جافة، وعشان چدي عطني هذا الدوا وقالت للكحة الجافة وطلبت مني استخدمه 3 ايام بس، واليوم ثالث ما خفت الكحة ولا شي!!...
العسل تمام بعد .. استمري عليه .. مو مرة مرتين وتبين تصيرين زينة مو سحر هو
المشكلة ما أقدر اتحملها له كلش قوية ومتواصلة ما توقف :wei: وتوني اليوم الصبح بس قدرت انام، صار ليي 3 ليالي ما نمت خير شر:koo: ...
الاحسن انش تخلين العسل ويه حليب ساخن .. واذا ماتحبين الحليب اكلي العسل بروحه وشربي اشياءات ساخنه على طووووول ..
وهذا اللي اسويه حليب ساخن وعسل، خلّصت العسل والكحة مو راضية تروح :koo:
انزين خيوه أني مرة صادتني نفس هالكحة بس عطوني المستشفى دوا لونه احمر وفيه حرارة شويه وطعمه كلش عجيب :hui: ومن شربته أول يوم خفت عني الكحة ما تعرفين وش اسمه :wer:
أشوف ناس واااجد تكح بالجامعة...الكل يعاني من الجو المتقلب...الله يساعدش..و عافيش:)
حرية تائهة
16-01-2007, 17:26
بواسطة: زنبقة
الله يشافيك
الدواء مفيد مع دوام الاستعمال ..
الحليب الساخن .. والعسل الطبيعي مفيد ..
لكن اللي أعرفه إن الكحة تاخذ وقت .. حتى تروح ..
الله يعطيك الصبر و يشافيك يا أختي ..
صار ليي 6 أيام يعني هيه ناوية تطول ويايي :wei:
هيه الصبح تصير أشوه كلما أقول خفيت اشوف في بس في الليل تزيد
كانت بجنبي سيدة اعتقد ان جنسيتها عراقيه كانت تسألني عن حالتي و ش فيي و اعطتني دواء قالت لي ان هذا الدواء من ايران و ما في منه في البحرين وو صفة لي طريقة استخدامه و فعلاً جزاها الله خير الجزاء من اخذت هذا الدواء و كأن شياً لم يكن .
هذا الدواء هو علي شكل حجر اسود تحصلينه فقط عند الجواهري تاخذين قطعة صغيرة بمقدار حبة النخج و تذوبينها في كوب ماء ساخن و تشربينه بشكل يومي .
صدقيني انا لا زلت اذكر تلك السيده و ادعوا لها من كل قلبي بالفرج و قضاء حاجتها.
خيو قولي ليي وش هالحجر الأسود، ويش اسمه بالضبط ووين أقدر أحصله؟!
ومفعوله اكيد فعال من اول استخدام؟
بس خبريني بدعي ليش وليها :klm:
حرية تائهة
16-01-2007, 17:37
حريتووووو ،، إذا خرج جيش يدافع عن أرضه ،، تحبين تمنعينه أو توقفينه ؟؟
الكحة هي طريقة من طرق الجسم للدفاع عن نفسه ضد عنصر دخيل ، فليش تبغين تمنعينها ؟؟
هو المشكلة الكحة ما اخذت تصريح مني عشان تحارب في حلقي :hitler:
ويعني هيه ما تعرف تحارب بهدوء :hun:
اني مو مانعتنها بس يعني تخفف شوي من هجومها مو بشكل متواصل
وما تدور تهجم بزيادة إلا في الليل ؟!!
شكلها بتخرب البنية التحتية والفوقية وبتدمر حلقي واللي صوب حلقي
لأن ادوني من زود الكحة قامت اتعورني :koo:
ساعدكِ الله خيوو ،، ماتشوفين شر ،،
على عمري أختي حريتوو ،،
أني بعطيش حل ،،
أكلي مثلج وشربي سوائل باردة ،،
الكحرة كريهه ،، صار لي فترة رافقتني اكثر من شهر بس فترة بشكل خفيف وفترة تزيد ،،
جربي انتين دواش بعدين قولي ليي النتيجة :rew:
حرية تائهة
16-01-2007, 17:44
بواسطة: أنوار موسوية
ماعليش شر وان شاء الله تخف عليش الكحة بسرعة ولو ان هذا مستحيل هي أول تكسر ضلوع الصدر والعافية بعدين تفكر تخف !!
هلا خيو انوار موسوية :uio:
:wei: يعني لمتى!! أني قلت هاليومين بتخف :wei:
..
ما عندي حل لأن اللعام جتني نفس الحالة وماخفيت إلا بعد مرور شهرين !! نصحتني القصيدة الضائعة الله يشافيها ويعافيها بدوا السعلة أبو الورقة الخضرة لكن الكحة أول تاخد حيفها بعدين تخف !!
لا تشربين دواء السعلة وتطلعين تسوقين !! :wej: شهرين!!، أني 6 أيام ما أقدر اتحملها شلون بتحملها شهر :koo:
هذا أبو ورقة هوه الدوا اللي اخذته أول شي اسمه (منتكس) وعليه ورقه خضره، نشف حلقي وخل الكحة جافه، طلع ما يصلح ليي...طلع ما يأثر فيي خير شر، ولا يجيب ليي النعاس نفس ما مكتوب عليه...
..
انوار المنتظر
16-01-2007, 18:29
صار ليي 6 أيام يعني هيه ناوية تطول ويايي :wei:
هيه الصبح تصير أشوه كلما أقول خفيت اشوف في بس في الليل تزيد
خيو قولي ليي وش هالحجر الأسود، ويش اسمه بالضبط ووين أقدر أحصله؟!
ومفعوله اكيد فعال من اول استخدام؟
بس خبريني بدعي ليش وليها :klm:
اخيتي اني ما اعرف اسمه لاني كنت اول مره اجربه بس هو عند الجواهري الي يبيع الأعشاب و الأدويه في المنامه لونه بني غامكَ كأنه اسود اذا رحتين قولي ليهم مال كحه و اوصفيه اكيد هم يعرفونه هو معروف عند العجم بس (بس في ملاحظه نسيت اذكرها ان المره الي عطتني الدوا قالت لي انه ما يصلح للي عندهم سكر) انا اواكد ليش انه جداً مريح خاصةً في الليل.
السلام عليكم ورحمة الله وبركاته
ما تشوفين شر
والله في طريقة ان شاء الله تنفعش
أخذي كوب ماء ساخن وأعصري فيه ليمونه ( قطرة أو قطرتين بس) وحطي قفشة عسل وأخلطيهم مع بعض وشربيه على طول قبل ما تنامين
والله يشافيش ان شاء الله